• தீபம் - ஆன்மீகம்

பகவானின் ஆயிரம் நாமம் சொல்லும் நான்கு வரி ஸ்லோகம்!


எ.எஸ்.கோவிந்தராஜன்





மகாபாரதத்தின் இறுதிக்கட்டம் - பீஷ்மர் அம்புப் படுக்கையில் மரணத்தை எதிர்நோக்கிப் படுத்திருக்கிறார். கர்ணன் வஞ்சனையால் கொல்லப்படுகிறான். குந்திதேவி கர்ணனை மகனே என்றழைத்து துக்கம் அனுஷ்டிக்கிறாள். கர்ணனுடைய மனைவியும் அவன் உடல்மேல் விழுந்து கதறுகிறாள். இவர்களோடு இன்னொரு பெண்மணியும் கர்ணனுக்காக அழுகிறாள். அதைக் கண்ட தருமபுத்திரர் கிருஷ்ணனிடம், “இவள் யார்? இவள் ஏன் அழுகிறாள்?” என்று கேட்டார்.

அதற்கு கிருஷ்ணர், “இவள் தர்ம தேவதை. ‘இனி உலகில் தர்மமே இருக்கப் போவதில்லை. தர்மம் செய்வதற்கென்றே பிறந்தவன் கர்ணன். அவனே போய்விட்ட பிறகு பூமியில் எனக்கென்ன வேலை?’ என்று உலகை விட்டுப்போகிறாள்” என்றார்.

தர்மபுத்திரரை பயம் சூழ்ந்து கொண்டது. காரணம், ‘பாண்டவர்களின் பேரனான ஜெனமே ஜெயன் ஆளும்போது இந்த நாட்டில் தர்மம் இருக்காதா?’ என்கிற பயம்தான் அது. “தர்மம் மீண்டும் செழிக்க என்ன செய்ய வேண்டும்?” என்று பரந்தாமனை கேட்கிறார் தர்மன்.

பரந்தாமனோ, “அம்புப் படுக்கையில் இருக்கும் பீஷ்மரை கேள்; அவர் சொல்வார்” என்றார். பீஷ்மரும் தர்மதேவதை உலகை விட்டுச் செல்வதால் ஏற்படப்போகும் அவலங்களைச் சொல்கிறார் : “இனி உலகம் செழிப்புற்று விளங்காது. தேசங்கள் ஒவ்வொன்றும் அநியாயமாகச் சண்டையிட்டு அழியும். அரசர்கள் நீதிமான்களாக இருக்க மாட்டார்கள். அவர்களிடம் பணிபுரியும் அமைச்சர்கள் முதல், பணியாட்கள் வரை ஊழல் செய்து, மக்களை வாட்டி தவறான வழியில் தனம் சேர்ப்பார்கள். அரசனிடம் நல்லவற்றிற்கு நீதி கிடைக்காது. குருமார்கள் தங்கள் சீடர்களுக்கு ஒழுங்காகப் பாடம் சொல்லிக் கொடுக்க மாட்டார்கள்; சீடர்களும் ஒழுங்காகப் படிக்க மாட்டார்கள். படித்தவன் சூதும் வாதும் செய்வான். மழை பொழியாது; நிலங்கள் விளைச்சலைக் கொடுக்காது; பஞ்சமும் பட்டினியும் தலைவிரித்தாடும். கணவன்மார்கள் தங்கள் மனைவியை சரிவர காப்பாற்ற மாட்டார்கள்; மனைவிமார்களும் பதிவிரதையாக இருக்க மாட்டார்கள். அவர்களின் குழந்தைகள் தவறான வழியில் நடக்கும்...”

இப்படி, பீஷ்மர் சொல்லச் சொல்ல பாண்டவர்கள் பயந்தனர். “இதிலிருந்து தங்கள் சந்ததியினர் தப்பிப்பது எப்படி?” என்று கேட்டனர்.

“அதை ஸ்ரீ கிருஷ்ணனே சொல்லுவார்” என்று பீஷ்மர் கை காட்ட... கிருஷ்ணனோ, “நான் சொல்லுவதைவிட, உங்கள் நாவிலிருந்தே நல்ல வார்த்தைகள் புறப்படட்டும்” என்று சொன்னார்.

அப்போது புறப்பட்டவைதான் ஸ்ரீ விஷ்ணு சஹஸ்ரநாமம். அதாவது, ‘எம்பெருமான் ஸ்ரீமந் நாராயணனை ஆயிரம் பெயர் சொல்லி அர்ச்சித்து, அவன் மனம் குளிர வேண்டினால் தர்மம் மீண்டும் தழைக்கும்’ என்பதுதான் விஷ்ணு சஹஸ்ரநாமத்தின் மகிமை. ‘பகவானுக்கு ஆயிரம் பெயர்கள் உண்டா?’ என்று நாம் வியப்படையலாம்.

சாதாரண மனிதனாகிய நமக்கே பாலசுப்பிரமணியன் என்று பெயர் வைத்தால், பாலா, பாலு, சுப்பிரமணி, சுப்பு, மணி, மணியன் என்று பல பெயர்களால் அழைக்கும்போது, பகவானுக்கு ஆயிரம் பெயர்கள் இருக்காதா என்ன? இந்த ஆயிரம் பெயர்களைச் சொல்லி, பகவானை வேண்டினால் கொஞ்சமாவது தர்மம் பிழைக்கும் என்பது பீஷ்மர் வாக்கு.

உடனே, பார்வதி தேவிக்கு சந்தேகம் வந்து விட்டது. அவள் சர்வேஸ்வரனான தனது கணவனிடம், “சுவாமி, இது எப்படி சாத்தியமாகும்? ஆயிரம் நாமங்கள் சொல்லி, அதனால் தர்மம் தழைக்கும் என்றால், அந்த நாமங்களை பண்டிதர்களால் சொல்ல முடியலாம்; படித்தவர்களால் சொல்ல முடியலாம். ஆனால், படிக்காத ஒருவன் ஆயிரம் பெயர்களை நினைவில் வைத்துக்கொண்டு சொல்ல முடியுமா?” என்று கேட்டாள்.

அதற்கு ஈஸ்வரன், “தேவி... நீ சொல்வது சரிதான். ஏதுமறியாத ஒருவன் ஆயிரம் பெயர்கள் சொல்லி திருமாலை வேண்டுவது நடக்காத காரியம்தான். ஆனால், அதற்கும் ஓர் வழி உண்டு.

‘ஸ்ரீராம ராம ராமேதி

ரமே ராமே மனோரமே

ஸஹஸ்ர நாம தத்துல்யம்

ராம நாம வரானனே’

எனும் நான்கு வரி ஸ்லோகத்தை மூன்று முறை சொன்னாலே போதும். சஹஸ்ரநாமம் சொன்ன பலனை அடையலாம்” என்றார்.

‘இப்படிச் சொல்வதால் நமக்கு என்ன பலன் கிடைக்கும்?’ என்று கேட்கலாம். மரா... மரா... மரா... என்று ராம நாமத்தை உச்சரித்து, திருடனாக இருந்த வால்மீகி மகரிஷியாக உயரவில்லையா? அதுதான் ஸ்ரீராம நாம மகிமை.

மேலும், விஷ்ணு சஹஸ்ரநாமத்தை ஆண்கள், பெண்கள், குழந்தைகள் என அனைத்து இனத்தைச் சேர்ந்தவர்களும் சொல்லலாம். முழு மனதோடு பகவானை சரணாகதி அடைந்தால் பலன்களை அவன் தருவான். தர்மம் தழைக்கும். பேய், பிசாசுகள் அண்டாது. வியாதிகள் அணுகாது. வைத்தியர்கள் கைவிட்ட தீராத நோய்கள் தீரும். சுகப்பிரசவம் நிகழும். நோயாளிகளின் காதருகே அவர்கள் மனம் கேட்கும்படியாக சஹஸ்ரநாமப் பாராயணம் செய்வது மிகவும் உத்தமம்.

தினமும் காலையில் நமது வீடுகளில் இதை ஒலிக்கச் செய்வதன் மூலம் சகல சௌபாக்கியங்களுடன் வாழலாம். பலரது வாழ்விலும் இப்படிக் கேட்டு நன்மைகள் விளைந்திருக்கின்றன.

Comments

உங்கள் கருத்தைப் பதிவு செய்க :