சத்தான சுவையான பருப்பு திணை கிச்சடி :


Posted by-Kalki Team



பருப்பு, திணை வைத்து சுவையான சத்தான கிச்சடி செய்வது எப்படி என்று கீழே பார்க்கலாம்.

தேவையான பொருட்கள் :

வெங்காயம் - 1

பச்சை மிளகாய் - 2

இஞ்சி - 1 இஞ்ச் துண்டு

திணை - அரை கப்

பாசிப் பருப்பு - ஒரு கைப்பிடி

மஞ்சள் தூள் - ஒரு சிட்டிகை

நெய் - 1 தேக்கரண்டி

உப்பு - தேவையான அளவு

கேரட் - 1

பீன்ஸ் - 10

உருளைக் கிழங்கு - 1 சிறியது

தக்காளி - 1 சிறியது

முருங்கை இலை - கைப்பிடியளவு

தாளிக்க :

எண்ணெய் - 1 மேஜைக்கரண்டி

கடுகு - ½ தேக்கரண்டி

உளுத்தம் பருப்பு - ½ தேக்கரண்டி

சீரகம் - ½ தேக்கரண்டி

மிளகு - அரை ஸ்பூன்

வத்தல் மிளகாய் - 1

பெருங்காயம் - ஒரு சிட்டிகை

கறிவேப்பிலை - சிறிது

செய்முறை :

* அனைத்து காய்கறிகளையும் சமமான துண்டுகளாக வெட்டிக்கொள்ளவும்.

* திணை மற்றும் பாசிப் பருப்பை நன்கு கழுவி 1½ கப் சூடான நீரில் 2 மணி நேரம் ஊற வைக்கவும்.

* குக்கரில் எண்ணெய் விட்டு சூடானதும் கடுகு, உளுத்தம் பருப்பு, சீரகம், வத்தல் மிளகாய், பெருங்காயம், நல்ல மிளகு, கறிவேப்பிலை போட்டு தாளித்த பின் வெங்காயம், இஞ்சி, பச்சை மிளகாய் சேர்த்து வெங்காயம் பொன்னிறமாகும் வரை வதக்கவும்.

* வெங்காயம் வதங்கியதும் அதில் அனைத்து காய்கறிகள், கீரை, மஞ்சள் தூள் மற்றும் தேவையான அளவு உப்பு சேர்த்து 5 நிமிடங்கள் வதக்கவும்.

* பின்பு நீரில் ஊற வைத்த திணை மற்றும் பருப்பை ஊற வைத்த நீருடன் சேர்க்கவும். உப்பை சரி பார்த்துக் கொள்ளவும்.

* அதன் பின் குக்கரை மூடி வைத்து 2 விசில் வரும் வரை மிதமான தீயில் வேக வைக்கவும். பின்பு 5 நிமிடங்கள் சிம்மில் வைத்து பின் தீயை அணைத்து விடவும்.

* குக்கரிலுள்ள பிரஷர் முழுவதும் வெளியேறியதும் அதனை திறந்து அதனுடன் ஒரு தேக்கரண்டி நெய் சேர்த்து நன்கு கலக்கவும்

* சத்தான சுவையான பருப்பு திணை கிச்சடி ரெடி.


Post Comment

Post Comment